KULANG AT KUMPLETO (Tula) ni Jerold Noble Dramayo

Ang pananaw ng isang bulag, ay wala sa iyong paningin

Ang pahayag ng pepe, sa iyong boses ay wala rin

Sa pagtindig ng pilay, kumpleto mong paa’y uuurin

Pagkat kulang man sila, kumpleto din kung susuriin.

Madalas na nilalait, ‘pagkat sila’y kulang

Hindi normal kung ituring, minsan pa’y sinasaktan

Sila yaong itinatakwil, na madalas pang iniiwan

Kinalilimutang tao rin, na may puso at pakiramdam.

Kumpleto nga sila, kaya’t may dahilan upang magyabang

Manakit ng kapwa, at mang-api ng mayroong kulang

Mas madalas pang manlait, kaysa maawa’t tulungan

Yaong mas nangangailangan ng pag-aaruga, pagmamahal at kanlungan.

Mga anak ng Diyos na isinilang na may kapansanan

Kakambal ay galing, kahusayan sa iba’t ibang larangan

Bulag, pepe, binge, pilay o kahit ano pang kakulangan

Siguradong ang Ama, ay may ispesyal na inilaan.

Ang tunay na perpekto ay ang ating Diyos Ama

Ama ng lahat ng nilalang, may kapansanan man o wala

Walang kumpleto o kulang sa kanyang mga nilikha

Pagkat lahat ay pantay-pantay, sa paraan lang nagkakaiba.